FNR

Material

  • 330 ml Gedrénks-Béchs
  • Optional: Miessbecher, Waasser

Duerchféierung

Schëtt ongeféier 100ml an eng eidel Gedrénks-Béchs (oder probéier des Experiment nodeems de ongeféier zwee Drëttel vun der 330ml Béchs eidel gedronk hues). Stell d’Béchs an engem Wénkel op seng ënnescht Kant a probéier se esou ze balancéieren. Looss d’Béchs lass – wann d’Experiment klappt bleift se stoen! Du kanns duerno souguer probéieren se am Krees dréien ze loossen. Gëff hir e klenge Stups an si dréit eng Pirouette wéi eng Ballerina 😊.

Prinzip

Bei dësem Experiment geet et em de Schwéierpunkt vun engem Objet. Wann d’Béchs komplett voll oder komplett eidel ass, läit hire Schwéierpunkt zimmlech genee an der Mëtt vun der Béchs. A si bleift och nëmme riicht stoe soulaang dee Schwéierpunkt direkt iwwert de Kontaktpunkte läit. Dat kanns Du um eegene Kierper ausprobéieren: Stell Dech fir d’éischt riicht dohin a lee dech dann no vir. Wann s de dech ze wäit no vir lees, fäls de och no vir. Well däi Schwéierpunkt net méi direkt iwwert Denge Féiss ass. Eng voll oder eidel Béchs fält dofir em, wann een se probéiert esou opzestelle wéi an eisem Experiment.

Wann d‘Béchs awer elo just zu engem Drëttel gefëllt ass wéi an eisem Experiment, läit de kombinéierte Schwéierpunkt vun der Béchs an der Flëssegkeet ganz wäit ënnen an der Béchs, direkt iwwert de Kontaktpunkten tëscht der Béchs an dem Dësch. Dofir ass et méiglech d’Béchs an engem Wénkel ze balancéieren.

Well d’Flëssegkeet an der Béchs sech beweege ka bleift den Niveau vun der Flëssegkeet och deselwechten, wann d’Béchs sech am Krees dréint. De Schwéierpunkt bleift also bei der Pirouette op méi oder wéineger därselwechter Platz an d’Béchs bleift am Gläichgewiicht.

Tipps

D’Béchs bleift an der Balance wann déi zwou Kante vum ënneschte Buedem vun der Béchs den Dësch beréieren. Wann et net direkt klappt, schëtt e bëssen eppes aus oder dobäi a probéier nach eng Kéier. ¨

Kanns Du d’Béchs mat den 100ml och nach balancéiere wann s Du se iwwer Nuecht riicht an de Freezer gestallt hues?

A wéi vill Flëssegkeet brauchs de bei enger 500ml Béchs fir se ze balancéieren?

Vill Spaass beim Ausprobéieren 😊

Auteur: Michèle Weber (FNR)
Video: Melanie Reuter (FNR)

Auch in dieser Rubrik

Mikroskopie Kuck méi genee - mat engem klengen digitale Mikroskop

Mat dësem einfache Mikroskop dat sou grouss ass wéi eng Täscheluucht kanns Du dir op dengem Computer, Tablett oder Smartphone Detailer ukucken, déi fir d’Aen villäicht souguer onsiichtbar sinn.

FNR
Luftdruck Klebe Becher an einen Luftballon – aber ohne Kleber!

Dieser Ballon-Teufel hat ein Grobvakuum zwischen seinen beiden Ohren.

FNR
Kaffee-Experiment Wie funktioniert eine Vakuum-Kaffeemaschine?

Hier zeigen wir Dir die wahrscheinlich spannendste Methode Deinen Kaffee zu brauen.

FNR