Firwat fänkt d'Mullesaison am September un?

Umierkung vun der Redaktioun: Des ass eng liicht ugepasste Versioun vun engem Artikel deen ursprünglech den 15.09.2021 verëffentlecht gouf. Firwat ee just Mulle kache soll, déi zou sinn gouf ergänzt, an ob ee Mullen iesse soll, déi nom Kachen nach zou sinn, gouf relativéiert.  

Et ginn dräi Haaptgrënn, firwat frësch Mulle virun allem an de Méint mat engem „r“ – also vu September bis Abrëll – op den Dësch kommen. Deen éischten ass hiert Fleesch, dat vill Eewäiss enthält. Dat gëtt séier schlecht, esou datt d'Déieren traditionell lieweg vun der Recolte bis an d'Kachdëppen transportéiert ginn. Dat war fréier, wou se an de waarme Summerméint nach net richteg gekillt konnte ginn, net wierklech méiglech.

Dat dierft haut jo awer kee Problem méi sinn.

Richteg. Usech ginn et haut op ville Plazen dat ganzt Joer iwwer Mullen. De Gros gëtt awer nach ëmmer lieweg vun do, wou se gefaange ginn, bis an d'Kachdëppen transportéiert. Do ass et wichteg, datt se permanent gekillt bleiwen. Méi iwwert den Transport an der Infobox. Et kann een haut natierlech och op gefruere Mullen zréckgräifen. 

A wat ass den zweete Grond? 

Am Summer hu Mullen einfach manner Muskelfleesch, well si Energie fir d'Reproduktioun brauchen. All weiblech Muschel leet da bis zu zwielef Milliounen Eeër an d'Waasser, déi vun der Spermawollek vun de Männercher befrucht ginn. Dat ass e grousse kierperlechen Effort an ziert un de Reserve vun de klengen Déieren. Am Summer mussen d’Mullen also aus Régiounen oder Farmen kommen wou grad keng Reproduktioun stattfënnt.

An den drëtte Grond?

Dee betrëfft d'Fudder: Mullen ernären sech vu winzege Liewewiesen, déi si aus dem Waasser erausfilteren. An der waarmer Joreszäit kann d’Algebléi gëfteg Stoffer produzéieren, déi d'Muschelen och aus dem Waasser filteren an an hirem Fleesch uräicheren. Eng Muschelvergëftung wier d'Konsequenz heivun an dat ass net besonnesch spaasseg fir de Mullegourmet. Dowéinst schreift d'Gesetz et och vir, dass Muschelen op esou Gëfter musse getest ginn, ier se an de Verkaf ginn. An Europa gëtt och d’Waasserqualitéit iwwerwaacht, sou dass wärend enger Algebléi keng Muschelen aus dem Waasser geholl däerfe ginn.

Ah, dat ass gutt ze wëssen. Zum Schluss nach zwou praktesch Froen: Firwat soll ee just Mullen, déi zou sinn, kachen?

Wat mir un de Mullen esou gär hunn, sinn hir Schliissmuskelen. Wa sech de klenge viischten an de groussen hënneschte Schliissmuskel zesummenzéien, dann hale si d'Schuel vun der Muschel fest zou. Mulle ginn traditionell lieweg gekacht. Doudeg Muschele kënnen hir Muskelen net uspanen a kënnen deemno och hir Schuelen net zoumaachen. Dat ass de Grond, firwat oppe Mullen, déi och no Uklappen net zou ginn, virum Kachen aussortéiert musse ginn – si kéinte schonn doud sinn. A well sech d'Eewäiss an de Muskele vun doudegen Déieren zersetzt, kann e sech op dës Manéier och séier eng Vergëftung afänken. Nom Kache ginn d'Muschelen op, an dat muss och esou sinn.

Ma dat ass déi zweet Fro: Stëmmt et, datt ee Mullen, déi nom Kachen net op ginn, net soll iessen?

Et seet een effektiv ëmmer nach, datt ee Muschelen, déi nom Kachen nach ëmmer zou sinn, net soll eessen. D’Argument: Dat kann nämlech en Indiz dofir sinn, dass d’Schuel virum Kache mechanesch verklemmt oder verpescht war, an net, datt d’Muschel nach gelieft huet.   

Et gëtt awer heifir kee wëssenschaftleche Beweis. Par conter gëtt et eng Studie vun australesche Fuerscher, déi dat kontestéiert an och ënnersicht huet. D’Fuerscher hunn e ganze Koup Muschele giess, déi nom Kachen nach zou waren an et gouf hinnen net schlecht. Hir Conclusioun: Muschelen, déi virum Kache frësch waren, an nom Kachen nach zou sinn, kann een trotzdeem iessen.

Si weisen awer och drop hinn, datt et wichteg ass, datt d’Mulle frësch op den Dësch kommen, datt Mullen déi VIRUM Kachen op bleiwen auszortéiert ginn, an datt een de Geroch an d’Konsistenz vum Fleesch vu gekachte Mullen – egal ob op oder zou – ëmmer iwwerpréiwe soll.

Bei Liewensmëttel gëlt generell de Motto “When in doubt, throw it out” – also: Wee sech net sécher ass datt se frësch a gutt gekacht sinn, soll zoue Mullen net iessen.

Merci! Da kann ech meng meng nächst Portioun frësch Mullen elo ëmsou méi genéissen!

Auteur: scienceRELATIONS/Kai Dürfeld
Editor: Michèle Weber (FNR)
Iwwersetzerin: Danièle Di Cato (why vanilla?)