Hausaufgaben

shotshop.com

Hausaufgabe si sënnvoll – wann et déi richteg Aufgabe sinn a wann se am richtegen Moment geschriwwe ginn.

D’Summervakanz ass elo sou lues eriwwer an d’Schüler maache sech prett fir erëm an d’Schoul ze goen. An een dee Schoul seet denkt och un ...d’Hausaufgaben... Mee so mol, Mr. Science, bréngen Hausaufgaben eigentlech eppes? Oder ass et nëmmen eng Folter fir d’Schüler?

 Ech hunn se och net gär gemaach an se allze dacks vergiess.... Ech hunn deemools och net geduecht, datt Hausaufgabe vill géife bréngen. Ech hu mech awer deslescht mat engem Expert iwwert d’Thema geschwat: de Professer Martin Korte vun der Technescher Universitéit zu Braunschweig. Hien ass Neurobiolog an erfuerscht wéi Mënschen am beschte léieren.

An, wat seet de Professer dann zu Hausaufgaben?

Hausaufgabe si sënnvoll – wann et déi richteg Aufgabe sinn a wann se am richtegen Moment geschriwwe ginn.

Dat muss Du mir méi genee erklären…

Hausaufgaben hëllefe Schüler, déi Matière déi se an der  Schoul geléiert hunn, ze festegen an ze verdéiwen. Dofir ass et essentiell, datt sech d’Hausaufgaben inhaltlech op d’Matière vum Cours bezéien. Et mussen also Widderhuelungen an Übungen zu dem sinn, wat den Enseignant mat de Schüler an der Schoul duerchgeholl huet.

Falsch wier et, wa Schüler mat Hëllef vun Hausaufgabe selbststänneg nei Matière léiere missten. Dann hätten déi Kanner ee Virdeel, deenen hir Elteren sech mat dëser Matière auskennen an doheem quasi ee Privatcours kënne ginn, an déi aner sinn do am Nodeel.

An wat ass déi bescht Zäit, an der d’Schüler hier Hausaufgabe schreiwe sollten?

Dat ass déi Zäit, an der d’Kanner wakereg a leeschtungsfäeg sinn. Bei deem engen ass et direkt no der Schoul, ma deen anere brauch nach eng méi laang Paus dotëscht. Fir de richtegen Zäitpunkt ze fannen, do mussen d’Elteren oder d’Erzéier hëllefen.

Ganz eleng klappt et mat den Hausaufgaben also net?

Nee, virun allem Kanner aus der Grondschoul brauchen nach Ënnerstëtzung, mengt de Martin Korte. Net beim Contenu – mee bei der Strukturéierung vum Nomëtten. De Contenu sollten d’Kanner awer eleng léieren. Dee Moment géifen d’Hausaufgaben hëllefen, fir dat selbststännegt Schaffen ze léieren.

Solle Kanner, wann se Hausaufgabe schreiwen, belount ginn?

Här Professer Korte, Hausaufgaben si lästeg. Sollen Elteren d‘Kanner, wann se hier Hausaufgabe gemaach hunn, beloune – z.B. mat eppes Séissem oder Täschegeld?

Proff. Martin Korte: Nee, an der Reegel net. Natierlech sinn Hausaufgabe lästeg a maache kee Spaass. Mee esou ass dat nu mol mat de Flichten, déi jidderee vun eis maache muss.

Eng Belounung fir Selbstverständlechkeete wéi seng Hausaufgaben ze maachen, ass kee gutt Zeechen: Ech strenge mech nëmmen un, wann ech eppes dofir kréien.

„An der Reegel“ heescht awer och, datt et Ausname ginn?

Jo, a Krisesituatioune kënnen Elteren och emol eng Ausnam maachen. Wann keng Konzentratioun opkënnt, ee Feeler nom anere geschitt an eng Aufgab wierklech dringend gemaach muss ginn…

A wéi kritt een da Motivatioun beim Hausaufgabe maachen?

Wa Schüler(innen) déi richteg Hausaufgabe kréien an se am richtegen Zäitpunkt geschriwwe ginn, léieren si scho fir déi nächst Prüfung. Den Opwand fir d’Virbereedung vun der Prüfung ass da manner grouss, well d’Matière jo scho bësse „sëtzt“. Wann Elteren dat hire Kanner bäibréngen kënnen an d’Kanner da gutt Erfarunge maache – dann entsteet Motivatioun vu bannen eraus.

Fir jiddwereen déi selwecht Hausaufgabe – ass dat sënnvoll?

Um Enn vun der Schoulstonn gëtt den Enseignant d’Hausaufgaben – fir all Schüler dee selwechte Programm. Sou war d’Schoul schonn ëmmer, an sou ass et och dacks haut nach. Dobäi ginn et mëttlerweil Méiglechkeeten, vill besser ze diversifiéieren an Hausaufgaben ze verdeelen, déi dem individuellen Niveau vun de Schüler entsprécht.

„Hei ass d’Digitaliséierung eng richteg Chance“, seet de Professer Martin Korte vun der Technescher Universitéit Braunschweig. De Biolog erfuerscht d’Mechanisme vum Léieren: „Mat Hëllef vun digitale Léierprogrammer (Tutorien) kënnen d’Enseignante méi einfach Aufgaben aus zwee oder dräi Schwieregkeetsgrade verdeelen, an iwwerpréiwe wéi d’Schüler domat eens ginn. Dat verhënnert Ënnerfuerdere genee sou wéi Iwwerfuerderung a reduzéiert de Stress duerch Hausaufgaben.“

Och Léierwierkstätten, an deenen Enseignanten d’Hausaufgabe maache betreien, hunn eng gutt Wierkung: Hei kënne Schüler Froe stellen a mam Enseignant souguer Gespréicher iwwer d’Matière aus dem Cours féieren. „Dat féiert am Idealfall dozou, datt d’Schüler dat Geléiert op aner Liewensberäicher iwwerdréit. Dës Transfertleeschtung féiert zu enger besonnesch gudder Verdéiwung vun der Matière.“

Auteur: scienceRELATIONS (Hannes Schlender)
Editeur: Joseph Rodesch (FNR)
Iwwersetzerin: Melanie Reuter (FNR)

Infobox

Mr Science op ELDORADIO

All 2 Wochen beäntwert de Mr Science op Eldoradio eng Fro.

Auch interessant

LALA - "Lauter lëschteg Lauter" Ein praktisch und wissenschaftlich erprobtes Leseförderprogramm für Vorschulen

Lernschwierigkeiten bei Kindern vorbeugen und ihnen so bessere Startchancen für die Schullaufbahn geben.

My research in 90 seconds Schreiben in einer Fremdsprache – Schwierigkeit oder Chance?

Ist Mehrsprachigkeit mehr Herausforderung oder kann sie Quelle für Erfolg und Weiterentwicklung sein? Damit befasst sic...

Sprache beeinflusst mathematische Prozesse Das mehrsprachige Gehirn rechnet anders je nach Sprache

Das mehrsprachige Gehirn rechnet je nach angewendeter Sprache anders. Zu diesem Ergebnis kommt eine aktuelle Studie der...

Auch in dieser Rubrik

Cumuluswolke
Wolleken op der Wo Firwat fale Wolleken net vum Himmel, obwuel se vill Tonne schwéier sinn?

Wéi vill Waasser ass eigentlech an de Wolleken dran a wéi schwéier sinn se?

FNR
Best of 10 Joer Pisa Happy Birthday, Mr. Science!

En Zesummeschnëtt vun de stäerkste Momenter aus 10 Joer Mr Science am Pisa Wëssensmagazin, souwéi en Artikel dee fir de Rapport Annuell vum FNR geschriwwe gouf.

FNR, RTL
Geschenke
Déi beschte (Chrëschtdags)-Kaddoen Wat fir eng Kaddoe maachen am glécklechsten?

Mir maachen eise Léifsten esou gäre Kaddoen. Awer dacks ass et schwéier, dat Richtegt ze fannen. Wat fir eng Kaddoe maachen am glécklechsten, Mr Science?

FNR