Niesen

shotshop.com

Dacks kritt een am Wanter séier de Schnapp.

Elleng duerch Keelt kann een sech net erkalen. Et muss ee scho mat engem Virus infizéiert ginn, dee Schnapp verursaacht. Awer fir erauszefannen, ob een duerch Keelt méi ufälleg fir esou eng Infektioun gëtt, hu virun iwwer engem hallwe Joerhonnert Fuerscher aus Groussbritannien honnerte Fräiwëlleger mat Schnappviren infizéiert. En Deel vun hinnen huet sech zousätzlech stonnelaang der Keelt missten aussetzen. Awer si goufen am Duerchschnëtt net méi dachs krank wéi déi Participanten, déi am Waarme bleiwen duerften. Amerikanesch Fuerscher hunn änlech Versich gemaach, mee hunn och kee Beweis dofir fonnt datt Keelt eleng Schnapp verursaacht. Dofir ass déi verbreete Meenung an der Medezin, dass een duerch Fréieren eleng net méi ufälleg fir de Schnapp gëtt.

Mee et liest een ëmmer erëm, datt Fuerscher elo awer Beweiser dofir fonnt hätten, datt een sech duerch Keelt erkale kann?

Et gëtt Versich mat Mais oder Schnappviren a mënschlechen Immunzellen am Reagenzglas, déi als Beweis zitéiert ginn, datt Keelt Schnapp verursaache kann. Mee si sinn ze wäit ewech vu reale Konditiounen, dass een doraus sécher Conclusiounen zéie kéint. 2006 hu Fuerscher Participanten an enger Studie gebieden, hir Féiss a kal Waasser ze zappen. Dës Leit haten eng liicht méi héich Warscheinlechkeet, de Schnapp ze kréien, wéi Leit ouni kal Féiss. Et waren awer ze wéineg Participanten, fir déi klassesch Schnappversich aus England an Amerika ze widderleeën.

Firwat hält sech déi Virstellung da sou haartnäckeg?

Dat hänkt warscheinlech domat zesummen, dat ee bei enger Erkältung fréiert an dofir Keelt mat Erkältung an Zesummenhang bréngt. Keelt stécht jo souguer am Wuert Erkältung. An et kann dorunner leien, datt een sech meeschtens am Wanter erkaalt.

Firwat kommen dann Erkältungen am Wanter méi dacks vir wéi am Summer?

Dofir hunn d'Wëssenschaftler keng einfach Erklärung, mee si huelen un, datt et dorunner läit, datt mir am Wanter manner dobausse sinnn an eis méi dacks mat anere Leit dobannen ophalen. Sou kënne Schnappvire liicht vun deem engem zum anere wanderen. A well mir am Wanter hëtzen ass d'Raumloft dacks dréchen, wat fir eis Nuesschläimhaut guer net gutt ass: d'Schläimschicht dréchent aus, eis Ofwierzelle kënnen sech net méi gutt doranner beweegen. Sou hunn d'Schnappviren et liicht, eis iwwert d'Schläimhaut z'infizéieren.

Firwat gëtt et keng Impfung géint de Schnapp?

Et huet een zwar am leschte Joerhonnert probéiert, Impfstoffer fir eenzel Virestämm ze entwéckelen, mee am grousse Ganze gëtt et einfach ze vill verschidden Type vu Schnappviren. Et sinn der wäit iwwer 100. Mat enger Impfung géif een sech ëmmer nëmme géint een oder vläicht e puer speziell Virustype schützen. Et bräicht een honnerte verschidden Impfstoffer, déi een och nach andauernd weider entwéckele misst, well Schnappvire veränneren sech séier.

Auteur: Ingo Knopf/scienceRELATIONS
Editeur an Iwwersetzer: Michele Weber/FNR

Infobox

Mister Science op RTL RADIO

Dëse Reportage gouf an Zesummenaarbecht mat RTL Radio ausgeschafft an op der Antenne vun RTL Radio diffuséiert. All zweet Woch présentéiert de Mr Science op RTL Radio wat fir eng Fuerschung hannert Objeten aus dem Alldag stécht. All d'Emissioune fënns du hei: http://radio.rtl.lu/emissiounen/science

Quellen

Auch interessant

Medizin Gegen welche Krankheit kämpfte Stephen Hawking?

Am 14. März 2018 starb der brillante Astrophysiker nach über 50-jährigem Kampf gegen seine Krankheit. Wir werfen einen B...

FNR
Gesundheit Seltene Krankheiten – was weiß man und was tut sich in Luxemburg?

Anlässlich des Internationalen Tages der seltenen Krankheiten klärt science.lu über die Komplexität dieser häufig kaum b...

FNR
Dreck a Krankheet bei klenge Kanner Kann een de Sandkuch an der Sandkëscht probéieren?

Kleng Kanner spille gären an der Sandkëscht. Heiansdo stiechen se sech dobäi och e bësse Sand an de Mond oder iessen en...

FNR