Ass am Wanter genuch Sauerstoff an der Loft?

Wa Beem keng Blieder hunn, kënnen se keng Photosynthèse méi maachen, an also kee Sauerstoff méi produzéieren. Ma dee brauche mir jo fir ze otmen. Mr Science, ass am Wanter manner Sauerstoff an der Loft?

Ech kann dech berouegen – et ass genuch Sauerstoff do, mee ob es am Wanter manner do ass, dat kann een net liicht matt Jo oder Nee beäntweren. Wa bei eis Wanter ass, ass et Summer op der Südhallefkugel – et gëtt also permanent Sauerstoff produzéiert. Mee vue datt op der Nordhallefkugel méi Beem sinn well méi Land do ass, féiert datt dozou datt an eisem Wanter tatsächlech manner Sauerstoff op der Äerd produzéiert gëtt wéi am Summer[1].

Also geet de Sauerstoffgehalt an der Loft erof?

Jo relativ gesi scho, mee et ass immens wéineg par Rapport zu där Onmass Sauerstoff, déi mir an der Loft hunn. De Sauerstoff an der Loft huet sech iwwer Millioune Joren gebilt an huet sech op 21% agependelt. Am Summer gëtt méi Sauerstoff produzéiert mee d’Variatiounen tëscht Summer a Wanter sinn an der Gréisstenuerdnung vun +/- 2 Dausendstel Prozent.

Du sos: „relativ gesinn“ hätte mer manner Sauerstoff – stëmmt et also net?

Ma wann ee just d’Prozenter kuckt dann ass dat sou. Ma a Wierklechkeet hu mer am Wanter dobausse pro Liter Loft méi Sauerstoff wéi am Summer. Dat läit awer dorun datt, wann et kal ass, d’Loft méi dicht ass. E Liter kal Loft huet ongeféier 5% méi Mass wéi e Liter waarm Loft, doduerch ootme mer pro Otemzuch am Wanter méi Sauerstoff an wéi am Summer.

OK berouegend! D’Beem däerfen also weiderhin am Wanter hir Blieder verléieren.

Auteur : Joseph Rodesch (FNR)
Photo : Bucikah-stuff
Quellen: https://de.wikipedia.org/wiki/Kohlenstoffdioxid_in_der_Erdatmosph%C3%A4re