Mojtba moawia
Chilli enthält Capsaicin
Lecker Iessen, gewierzt mat Chilli: Firwat gëtt et engem da waarm, gëtt ee rout am Gesiicht an fänkt een u mat schweessen?
Dat ass dem Capsaicin seng Schold! Dat ass déi Substanz am Chilli, déi dës onangenehm Reaktioun ausléist. Doduerch soll se d’Déieren drun hënneren fir d’Planz ze friessen.
Wat geschitt dann do genee?
Mir hunn an eisem Mond verschidde Sensoren, fir Hëtzt a Péng ze detektéieren. Capsaicin aktivéiert net nëmmen de Sensor fir intensiv Péng, mee och dee fir Hëtzt. D’Gehir kritt also zwou Botschafte vum Capsaicin geschéckt: “ Ech verursaache Péng” an “ Ech si waarm”. Doraus schléisst et, dass eppes extrem Waarmes am Mond ass.
An da gëtt et engem tatsächlech waarm?
Nee, dat ass just eng Illusioun. Mee d’Gehir fält drop eran a gëtt dem Kierper de Kommando fir dréngend eppes géint déi extrem Hëtzt ze maachen: Eis Oderen dehnen sech zum Beispill aus, fir eist Blutt méi séier iwwert d’Haut ofzekillen. Duerch déi intensiv Duerchbluddung killt eise Kierper zwar of, mee mir ginn och rout am Gesiicht. An d’Schweessdrüse ginn och aktivéiert, fir eise ganze Kierper weider ofzekillen.
Mee a Wierklechkeet ass eise Kierper guer net waarm?
Nee. D’Fuerscher hunn esouguer erausfonnt, dass bei verschiddenen Déieren d’Kierpertemperatur däitlech erofgeet, well de Kierper sech ofkillt, obwuel en net iwwerhëtzt ass.
Mee waard emol, dat heescht Chilli verbrennt eis de Mond guer net, mir mengen dat just?
Jo, mir gi vum Chilli ausgetrickst fir dass mer en net méi sollen iessen. A mir iessen en awer! De Capsaicin selwer ass op alle Fall an normale Quantitéiten net schiedlech fir eise Kierper, mee d’Reaktiounen, déi en duerch seng Tricken ausléist, kënnen awer ënner Ëmstänn problematesch ginn.
A fir all déi, déi elo virwëtzeg sinn: Schmaacht emol eng Mentholkamell mat enger Drëps Tabasco drop a loosst iech iwwerraschen!
Virwëtzeg wat zum Thema Chilli zu Lëtzebuerg gefuerscht gëtt? Da kuck an der Infobox.
Auteur: Corinne Kroemmer
Editeur: Joseph Rodesch a Marc Diederich
Foto © Mojtba moawia
Infobox
Dem Marc Diederich säi Labo um Kierchbierg (Laboratoire de Biologie Moléculaire et Cellulaire du Cancer - lbmcc) beschäftegt sech scho säit laangem mat der Benotzung vun natierleche Substanzen am Kampf géint de Kriibs.
Si huelen eng Rei Wierkstoffer aus Gewierzer a Planzen ënnert d’Lupp a probéieren erauszefannen, op se eventuell kënne benotzt gi fir Kriibs virzebeugen oder ze behandelen. An deem Kontext hunn si d’Aarbecht vun engem amerikanesche Labo ervirgehuewen, déi 2007 kloer gewisen hunn, dass Capsaicin kriibshemmend ass an als Behandelung kéint a Fro kommen.
Dat kléngt villverspriechend, et muss een awer weider Studien ofwaarden ier Capsaicin enges Daags als Medikament kann op de Maart kommen.
