shotshop.com
Wat versteet een iwwerhaapt genee ënner Bioplastik?
"Bio" kléngt ëmmer gutt. Mee et sollt een sech fir d'éischt emol genau ukucken, wat een ënner Bioplastik versteet. Bei Plastik ka "Bio" nämlech vill verschidde Bedeitungen hunn. Plastik aus nowuessende Rohstoffer, biologesch ofbaubare Plastik oder Plastik, dee kompostéierbar ass. Do kann ee scho mol duerchernee ginn. Mee de Fazit vun den Ëmweltexperten ass awer eendeiteg: Bio-Plastikstute bréngen der Ëmwelt keen däitleche Virdeel. Si sinn a ville Fäll souguer déi méi schlecht Alternativ.
Wéi dann?
Wa Bioplastik aus nowuessende Réistoffer hiergestallt gëtt, wéi zum Beispill aus Mais oder Gromperen, huet dat dacks negativ Konsequenze fir d'Ëmwelt. Well des Planze gi meeschtens a grousse Monokulture mat vill Konschtdünger a Pestiziden ugebaut. An de Planze-Réistoff ersetzt dacks einfach nëmmen den Äerdueleg aus dem soss Plastik gemaach gëtt. Sou biobaséierte Plastik ass da genee sou onzersetzbar wéi konventionelle Plastik.
A wéi ass et da mat biologesch ofbaubarem Plastik?
Dee gëtt aus nowuessende Rohstoffer oder aus Äerdueleg hiergestallt a kann duerch Mikroorganisme verdaut an esou ofgebaut ginn. De Problem ass awer, datt dat dacks immens laang dauert. Brittesch Wëssenschaftler op der Universitéit Plymouth hunn dat getest: si hunn Tuten aus verschiddene Plastikszorten am Buedem vergruewen. Souguer no 3 Joer waren d'Tuten nach intakt, egal ob se aus konventionellem oder biologesch ofbaubarem Plastik waren. Dat ass de Grond, firwat ee Plastikstuten, déi biologesch ofbaubar oder kompostéierbar sinn, net op den eegene Kompostkoup gehaie soll. Mee och an der Bio-Poubelle hu se meeschtens näischt ze sichen, virun allem déi méi déck Barquetten aus Bioplastik well se sech souguer an industrielle Kompostéierungsanlagen ze lues zersetzen. Nëmme ganz wéineg biologesch ofbaubar Plastikszorten, z.B. déi gréng déi aus Maisstäerkt sinn, si fir den Kompostkoup am Gaart oder d'Bio-Poubelle gëeegent.
Ass Bioplastik also generell Quatsch?
Dat kann ee sou pauschal net soen. Et muss een de Wee vun der Produktioun bis zur Entsuergung genau suivéieren an e Gesamt-Ökobilan maachen. Dat ass vill Aarbecht fir d'Fuerscher. Réischt da kënnen si jee nom Asaatzzweck feststellen, wat fir d'Ëmwelt besser ass: biobaséierte Plastik, biologesch ofbaubare Plastik, oder Tuten, déi een ëmmer erëm benotze kann. Dat ass dacks guer net sou einfach ze decidéieren, dofir bleift d'Fuerschung ëmmer spannend.
Nach e puer aner Froen...
Auteur: Ingo Knopf/scienceRELATIONS
Iwwersetzung: Michèle Weber (FNR)
Editioun: Joseph Rodesch, Michèle Weber (FNR)
Infobox
- Untersuchung der Umweltwirkungen von Verpackungen aus biologisch abbaubaren Kunststoffen
Umweltbundesamt Deutschland, 2012
https://www.umweltbundesamt.de/publikationen/untersuchung-umweltwirkungen-von-verpackungen-aus - Environmental impact assessments of innovative bio-based products
European Commission 2018
https://ec.europa.eu/knowledge4policy/publication/environmental-impact-assessments-innovative-bio-based-products_en - Single-use plastics – A roadmap to sustainability
United Nations Environment Programme 2018
https://www.unenvironment.org/resources/report/single-use-plastics-roadmap-sustainability - Environmental Deterioration of Biodegradable, Oxo-biodegradable, Compostable, and Conventional Plastic Carrier Bags in the Sea, Soil, and Open-Air Over a 3‐Year Period
Imogen Napper, Richard Thompson, Environmental Science and Technology, 2019
https://pubs.acs.org/doi/10.1021/acs.est.8b06984 - Life cycle assessment of grocery carrier bags
The Danish Environmental Protection Agency, 2018
https://www2.mst.dk/Udgiv/publications/2018/02/978-87-93614-73-4.pdf
Dëse Reportage gouf an Zesummenaarbecht mat RTL Radio ausgeschafft an op der Antenne vun RTL Radio diffuséiert. All zweet Woch présentéiert de Mr Science op RTL Radio wat fir eng Fuerschung hannert Objeten aus dem Alldag stécht. All Emissioune fënns du hei: http://radio.rtl.lu/emissiounen/science
