“Shaken, not stirred” – Mécht dat wierklech en Ënnerscheed?

“Wodka Martini! Geschüttelt, nicht gerührt” ass de berühmte Saz aus de Bond Filmer. Mécht dat eigentlech en Ënnerscheed ob een e Gedrénks rëselt oder réiert?

Et kinnt ee mengen datt een a béide Fäll jo just géif de Wodka an de Martini matenee vermëschen - mee chemesch a physikalesch gesinn gëtt et e reellen Ënnerscheed tëschent dem Rëselen a Réieren. Wann een eppes rëselt, vermëscht een nämlech net nëmmen d’Flëssegkeete mateneen, mee et mécht een zousätzlech Loft matt an d’Flëssegkeet.

Geet déi da net direkt rëm raus ?

Nee, een Deel vun der Loft gëtt, zumindest fir kuerz Zäit, an der Flëssegkeet gebonnen. Doduerch ännert sech d’Textur vum Gedrénks. E frësch gerëselte Cocktail mat Loftblosen oder Schaum gëtt en anert Gefill op der Zong. E gëtt méi lëfteg an doduerch schmaacht en anescht.

An du soots: Chemesch gesinn passéiert och eppes beim rëselen... ?

Jo de Sauerstoff an der Loft huet während dem Rësele genuch Zäit fir matt den Aromastoffer aus de Flëssegkeeten ze reagéieren. Dobäi passéieren ënner anerem sougenannten Oxidatiounsreaktiounen, an des féieren och dozou datt de Goût sech ännert. Ech hu selwer elo keng Testerei gemaach an ech weess net ob een e groussen Ënnerscheed schmaacht, mee eent ass sécher – et ass en Ënnerscheed moossbar.[1]

Mistère geléist also?

Ha du wärs laache mee et gi ganz Kapitelen a Bicher iwwert dat Thema – ech hu rar e sou en onwichtegt Thema gesi wat sou vill a kontrovers diskutéiert gëtt :-)

Wat engem besser schmaacht muss wahrscheinlech jiddereen selwer testen.